[මෙය Socialism against oligarchy, fascism and war යන මැයෙන් 2025 ජනවාරි 03 පල කෙරුනු ඉදිරිදර්ශන ලිපියේ පරිවර්තනයයි.]

දේශපාලන විශ්ලේෂනය සඳහා ඓතිහාසික භෞතිකවාදී විධික්‍රමය මුලින්ම උපයෝග කරගත් අවස්ථාවලින් එකක් වන “ප්‍රංශයේ පන්ති අරගල”යන ඔහුගේ ඇති බලගතු රචනය තුල, කාල් මාක්ස් සඳහන් කලේ, 1830 ජූලි මාසයේදී ඕර්ලියන්ස් ආදිපාදවරයා බලයට ගෙන ආ “විප්ලවයේ රහස” මූල්‍ය විශාරද ලෆිට්ගේ මෙම වචන වලින් සාරාංශගත ව ඇති බවයි: “මෙතැන් පටන් බැංකුකරුවන් පාලනය කරනු ඇත.” ලෆිට්, එලොන් මස්ක්ගෙන් යාවත්කාලීන කල විට සහ 1830, 2024 ට මාරු කල විට, ට්‍රම්ප්ගේ තේරී පත්වීමේ “රහස,” “මෙතැන් පටන් කතිපයාධිකාරීන් පාලනය කරනු ඇත” යන වචන වලින් සාරාංශගත කල හැකිය.

යන්තම් තව සති තුනකින් බලයට පත්වන ට්‍රම්ප්ගේ නැවත බලයට පැමිනීම ඉමහත් විනාශයක් මෙන්ම, මූලික හැරවුම් ලක්ෂ්‍යක් ද වේ. ඇමරිකානු ෆියුරර් (Führer--හිට්ලර් සමග අනන්‍ය වූ ජර්මන් බසින් නායකයා යන වචනයයි.) නැවත තේරී පත්වීමෙන් පෙන්නුම් කෙරෙන්නේ, 2016 දී ඔහුගේ ආරම්භක ජයග්‍රහනය සහ 2021 ජනවාරි 6 ඒ සඳහා කුමන්ත්‍රන උත්සාහය අපගමනයන් නොව, එක්සත් ජනපදයේ සහ ලොව පුරා දේශපාලනය අති මූලිකව යලි-පෙලගැස්මක ප්‍රකාශනයන් බවයි.

එලැඹෙන පලනතන්ත්‍රය, ධනවතුන් විසින් තෝරා පත්කරගත් ධනවතුන් සඳහා වූ ධනවතුන්ගේ ආන්ඩුවක් වනු ඇත. ලෝකයේ ධනවත්ම මිනිසා සහ ඔර්වෙලියානු ව්‍යංගයෙන් හැඳින්වෙන “ආන්ඩුවේ කාර්යක්ෂමතා දෙපාර්තමේන්තුවේ” ප්‍රධානී මස්ක්ගේ සිට ට්‍රම්ප්ගේ කැබිනට් මන්ඩලයේ සහ ධවල මන්දිරයේ සේවයට ප්‍රකෝටිපතියන් එක්රැස් කිරීම දක්වා සිදුව ඇති පරිදි, ඇමරිකානු ඉතිහාසයේ පෙර නොවූ විරූ මට්ටමකට, කතිපයාධිකාරය විසින් ම රාජ්‍යය මත සෘජු පාලනයක් ක්‍රියාත්මක කරනු ඇත. දෙසැම්බර් මැද වන විට, ට්‍රම්ප් පරිපාලනයේ මෙම ඉහල ස්ථරයේ මුලු වත්කම ඩොලර් ට්‍රිලියන භාගයකට ආසන්න වූ බවට ඇස්තමේන්තු කර තිබේ.

නව ආන්ඩුවේ ස්වරූපයෙන් සලකුනු වන්නේ, ධනේශ්වර සමාජයේ ස්වභාවයට අනුරූප වන පරිදි රාජ්‍ය ප්‍රචන්ඩ ලෙස ප්‍රතිසංවිධානය කිරීමකි. ලෝකයේ ධනවත්ම පුද්ගලයන් සහ සංගත විසින් සම්පත් පාලනය කරන්නේ සිතාගත නොහැකි පරිමානයකිනි. මෙම ඉහල යන කෝටි- ප්‍රකෝටිපතියන් සංඛ්‍යාවේ පුද්ගලික ධනයලෝකයේ දුප්පත්ම රටවල් 120 දල දේශීය නිෂ්පාදිතයේ එකතුවට වඩා වැඩිය. එක්සත් ජනපදයේ ධනවත්ම පුද්ගලයින් තිදෙනා දැන්, ජනගහනයේ පහලින්ම සිටින සියයට 50 ධනයේ එකතුවට වඩා වැඩි ධනයක් පාලනය කරති.

ගෝලීය වශයෙන් ගත්කල, ජනගහනයේ ඉහල ම සියයට 1 දැන් පහල සියයට 99 ට වඩා වැඩි ධනයකට හිමිකම් කියයි. බ්ලූම්බර්ග් නිව්ස් හි නවතම සම්පින්ඩනයට අනුව, ලෝකයේ ධනවත්ම පුද්ගලයින් 500 දෙනා “2024 දී අතිශයින් ධනවත් වෙමින්,” නව සන්ධිස්ථානයක් කරා ලඟා වූහ: ඔවුන්ගේ මුලු ශුද්ධ වටිනාකම ඩොලර් ට්‍රිලියන 10 කි. බ්ලූම්බර්ග් වාර්තා කරන්නේ, “තාක්ෂනික යෝධයින් අටදෙනෙක් පමනක් මේ වසරේ ඩොලර් බිලියන 600 කට වඩා වැඩි ප්‍රමානයක් උපයා ගත් බවයි; එය ධනවත්ම පුද්ගලයින් 500 දෙනා අතරේ වැඩි වූ ඩොලර් ට්‍රිලියන 1.5 න් සියයට 43 කි.”

ට්‍රම්ප් නැවත තේරී පත්වීම, දේශපාලන ප්‍රතිගාමිත්වයේ දීර්ඝ ක්‍රියාවලියක කූටප්‍රාප්තිය වන අතර ඉදිරියේදී සිදුවීමට නියමිත දේ පිලිබඳ පෙර නිමිත්තකි. වසර පහකට පෙර, 2020 ආරම්භයේ දී, ලෝක සමාජවාදී වෙබ් අඩවිය 2020 ඇරඹෙන දශකය “සමාජවාදී විප්ලවයේ දශකය” ලෙස සංලක්ෂනය කල ප්‍රකාශයක් පල කලේය. පසු ගිය වසරවල පෙර නොවූ විරූ සහ අන්තර්ඡේදනය වන අර්බුද මාලාවක් දැකගත හැකි විය. 2024 අලුත් අවුරුදු ප්‍රකාශය තුල, පවතින කොවිඩ්-19 වසංගතයේ සමූහ මරන “සාමාන්‍යකරනය'; යුක්‍රේනය තුල රුසියාවට එරෙහිව තීව්‍ර වන එක්සත් ජනපද-නැටෝ යුද්ධයේ දී න්‍යෂ්ටික අවි “සාමාන්‍යකරනය”; සහ ගාසා තීරයේ අධිරාජ්‍යවාදී පිටුබලය ලබන ඊශ්‍රායල ජන සංහාරය “සාමාන්‍යකරනය” ගැන ලෝසවෙඅ අනතුරු ඇඟවීය.

ට්‍රම්ප් නැවත තේරී පත්වීම ෆැසිස්ට් ම්ලේච්ඡත්වය සහ ධනේශ්වර ආඥාදායකත්වය “සාමාන්‍යකරනයේ” දේශපාලන ප්‍රකාශනයකි. ඩිමොක්‍රටික් පක්ෂය සහ ධනේශ්වර මාධ්‍ය විසින් මෙම සාමාන්‍යකරනය සලකුනු කර ඇත්තේ, ට්‍රම්ප්ගේ ප්‍රජාතන්ත්‍රවාදයට එල්ලවන තර්ජනය ගැන පමනක් නොව, “එෆ්-වචනය” එනම් ෆැසිස්ට්වාදය ගැන සියලු සඳහන් කිරීම් අතහැර දැමීමෙනි. ඒ වෙනුවට, ඔවුන් ට්‍රම්ප් සහ රිපබ්ලිකානුවන්ට සිය පූර්න සහයෝගීතාවය ලබා දීමට ප්‍රතිඥා දී ඇත.

බලයට පත්වන පාලනතන්ත්‍රය, “පලමු දිනයේ” සිට, සංක්‍රමනිකයන් සහ සරනාගතයින් වෙත මුලින් ම අවධානය යොමු කරමින්, ප්‍රජාතන්ත්‍රවාදී අයිතීන් මත දැවැන්ත ප්‍රහාරයක් ක්‍රියාවට නැංවීමට සැලසුම් කරයි. සිවිල් යුද්ධයෙන් පසු සම්මත කරන ලද, එක්සත් ජනපද ආන්ඩුක්‍රම ව්‍යවස්ථාවේ 14 වැනි සංශෝධනයේ මුල් ගලක් වන, ජන්ම අයිතියෙන් ලැබෙන පුරවැසිභාවය අහෝසි කිරීම එහි අතිශය ආන්තික යෝජනා අතර වේ. ආන්ඩුව ධනවතුන් සඳහා තව දුරටත් බදු කප්පාදු කිරීමටත්, කටුක අරගලය තුලින් කම්කරුවන් දිනාගත් සෑම සමාජ වැඩසටහනක් ම අලලා ගත් ප්‍රහාරයකට සූදානම් වන තතු තුල, සංක්‍රමනික කම්කරුවන් ඉලක්ක කර ගැනීම, සමස්ත කම්කරු පන්තියේ ප්‍රජාතන්ත්‍රවාදී හා සමාජ අයිතීන්ට එරෙහි පුලුල් ප්‍රහාරයක ඉදිරියෙන් ම පවතී.

එක්සත් ජනපදය තුල වඩාත් ප්‍රකටව පෙනෙන ක්‍රියාවලීන් ඇත්ත වශයෙන්ම විශ්වීය වේ. ලොව පුරා ධනේශ්වර ආන්ඩු, දැවැන්ත දේශපාලන අර්බුද තුල එකතැන පල්වෙමින්, මහජන විරෝධයට මුහුන දෙමින් සහ වැඩි වැඩියෙන් අධිකාරීවාදී පියවරයන් වෙත යොමු වෙමින් සිටී.

දැන්, මස්ක්ගේ විවෘත සහයෝගය ඇතිව සහ දේශපාලන සංස්ථාපිතය පොදුවේ දකුනට මාරුවීම මධ්‍යයේ, ජර්මනියේ නව-නාසි ඕල්ටනේටිව් ෆර් ඩුයිෂ්ලන්ඩ් (ඒඑෆ්ඩී) ශක්තිමත්ම ධනේශ්වර පක්ෂය ලෙස මතුවෙමින් තිබේ. ප්‍රන්සයේ “බැංකු සභාපති” එමානුවෙල් මැක්‍රොන්, දැන්, නිව් පොපියුලර් ෆ්‍රන්ට් (එන්පීඑෆ්) සමග සහයෝගයෙන් පාලනය කරමින් සිටින්නේ, මරීන් ලෙ පෙන්ගේ ෆැසිස්ට්වාදී ජාතික රැලිය පක්ෂය ට පාර්ලිමේන්තු විපාර්ශ්වයේ කාර්යභාරය පවරා දෙමිනි.

මුසෝලිනීගෙන් උරුමය ලද, ඉතාලියේ, ජෝර්ජියා මෙලෝනිගේ අන්ත දක්ෂිනාංශික ආන්ඩුව, සංක්‍රමන විරෝධී ප්‍රතිපත්ති තීව්‍ර කරමින් සිටින අතර, ආර්ජන්ටිනාවේ ජාවියර් මිලෙයි, මහජන සේවා සහ කම්කරු ආරක්ෂන පිලිවෙත් බිඳහෙලා සමාජ ප්‍රතිගාමීත්වය වෙත අන්ත-දක්ෂිනාංශික ආකෘතියක් සපයමින් සිටී.

ශ්‍රී ලංකාවේ, පසුගිය වසරේ මැතිවරනයෙන් බලයට පත් වූ දක්ෂිනාංශික, සිංහල ස්වෝත්තමවාදී සහ ජාතිකවාදී ජවිපෙ, ජාත්‍යන්තර මුල්‍ය අරමුදලේ නියෝග ක්‍රියාවට නැංවීමට වහා පියවර ගෙන ඇත. හමුදා නීතිය පැනවීමට උත්සාහ කරන අතරතුර ජනාධිපති සහ අගමැති යන දෙදෙනාම දෝෂාභියෝගයට ලක් කිරීමත් සමඟ දකුනු කොරියාව දේශපාලන අර්බුදයකින් පීඩා විඳී. ඕස්ට්‍රේලියාවේ, තරයේ ම අපකීර්තියට පත්ව තිබෙන ලේබර් ආන්ඩුව, සංක්‍රමනිකයන්ට සහ තම රටේ කම්කරු පන්තියට එරෙහිව යුද්ධ කරන අතරම, චීනය සමග එක්සත් ජනපද යුද්ධයකට සම්බන්ධ වීමට පෙර සූදානම ඇතුලු, දක්ෂිනාංශික ලිබරල්/ජාතික සභාගයෙන් වෙන්කර හඳුනාගත නොහැකි ආකාරයේ ප්‍රතිපත්ති අනුගමනය කර ඇත.

පසුගිය වසර පහ තුල ආධිපත්‍යය දැරුවේ, ධනේශ්වර අර්බුදයට පාලක පන්තියේ ප්‍රතිචාරය යි. ඉදිරි වසර පහ ආධිපත්‍යය දරනු ඇත්තේ, දැනටමත් ක්‍රියාත්මක වෙමින් පවතින පන්ති අරගලයේ ප්‍රචන්ඩ පිපිරීම් මගිනි. ලොව පුරා කම්කරුවන් උත්සන්න වන ගෝලීය යුද්ධයකට; එච්5එන්1 කුරුලු උන සහ එම්පොක්ස් වැනි නව රෝග කාරක මතුවීම සමඟ දැනට පවතින කොවිඩ්-19 වසංගතයට; මූලික ප්‍රජාතන්ත්‍රවාදී අයිතීන්ට එරෙහිව ඒකාබද්ධ ප්‍රහාරයකට ද සූරාකෑම තීව්‍ර කිරීමකට සහ සමාජ උවමනාකම් දැවැන්තව ඉහල දැමීමකට මුහුන දෙමින් සිටිති.

මෙම අන්තර් සම්බන්ධිත අර්බුදවල පදනමෙහි පවතින්නේ ලාභය සහ පුද්ගලික ධනය සමුච්චය කිරීම සඳහා සමස්ත සමාජයම යටත් කරගෙන සිටින කතිපයාධිකාරය යි. කතිපයාධිකාරයට එරෙහි සටන එහි ස්වභාවයෙන්ම විප්ලවවාදී කර්තව්‍යයකි. එහි ධනය අත්පත් කරගෙන, ආර්ථික හා දේශපාලන ජීවිතය මත එහි ග්‍රහනය අහෝසි කල යුතුය. මේ සඳහා දේශපාලන බලය ලබා ගැනීමටත්, නිෂ්පාදන ක්‍රියාවලිය මත ප්‍රජාතන්ත්‍රවාදී පාලනය ස්ථාපිත කිරීමටත්, සමාජවාදයේ පදනම මත—එනම් පුද්ගලික ලාභය සඳහා නොව, සමාජ අවශ්‍යතාවයන්ගේ පදනම මත—සමාජය ප්‍රතිසංවිධානය කිරීමටත් ලෝක පරිමානව කම්කරු පන්තිය බලමුලු ගැන්වීම අවශ්‍යවේ..

අධිරාජ්‍යවාදී යුද්ධයේ ගෝලීය පුපුරා යාම

අධිරාජ්‍යවාදී යුද්ධය සහ කොල්ලකෑම කතිපයාධිකාරයේ විදේශ ප්‍රතිපත්තිය යි. ලෙනින් පැහැදිලි කල පරිදි “අධිරාජ්‍යවාදය,” “(1) ඒකාධිකාරී ධනවාදය; (2) පරපෝෂිත හෝ දිරාපත් වන ධනවාදය; (3) මරනාසන්න ධනවාදය යි. නිදහස් තරඟකාරිත්වය වෙනුවට ඒකාධිකාරය ආදේශ කිරීම අධිරාජ්‍යවාදයේ මූලික ආර්ථික ලක්ෂනය මෙන්ම එහි පරම සාරය යි.” සම්පත් හා අමුද්‍රව්‍ය පිලිබඳ තරඟය තුල, අධිරාජ්‍යවාදී බලවතුන්, මානව වර්ගයා ව්‍යසනයකට ඇද දැමීමට තර්ජනය කරයි.

පැනමා ඇල අත්පත් කර ගැනීම, ග්‍රීන්ලන්තය මිලදී ගැනීම සහ මෙක්සිකෝවට මිලිටරිය යෙදවීමට තර්ජනය කිරීම පිලිබඳ ට්‍රම්ප්ගේ ප්‍රකෝපකාරී ප්‍රකාශ, එලැඹෙන පාලනතන්ත්‍රයේ අධිරාජ්‍යවාදී අභිලාෂයන් නිදර්ශනය කරයි. ට්‍රම්ප්ගේ ජාතිකවාදී “පලමුව ඇමරිකාව” ප්‍රතිපත්තියේ අනුපූරකය වන්නේ, චීනය සමඟ වර්ධනය වන ගැටුමේ දී බටහිර අර්ධගෝලය පාලනය කිරීම සඳහා අත්‍යවශ්‍ය බව සැලකෙන “ඇමරිකානු බලකොටුව” පිලිබඳ ගෝලීය ප්‍රතිපත්තියකි;

ඇමරිකානු අධිරාජ්‍යවාදයේ දශක තුනක කලාපීය යුද්ධ, බයිඩන් යටතේ, දෙවන විශාලතම න්‍යෂ්ටික සන්නද්ධ බලවතා වන රුසියාව සමග විවෘත ගැටුමක් දක්වා පුලුල් විය. 2022 පෙබරවාරියේ දී රුසියාව විසින් යුක්‍රේනය ආක්‍රමනය කිරීම, සෝවියට් සංගමය විසුරුවා හැරීමෙන් මතු වූ ධනේශ්වර කතිපයාධිකාරයේ අවශ්‍යතා නියෝජනය කරන පුටින් පාලනයේ බංකොලොත් හා ප්‍රතිගාමී ක්‍රියාවකි. කෙසේ වෙතත්, ධනේශ්වර මාධ්‍ය විසින් පොදුවේ කියා සිටින පරිදි එය “අප්‍රකෝපිත” ක්‍රියාවක් නොවේ. එය, නැටෝවේ නැගෙනහිර දෙසට වන අඛන්ඩ ප්‍රසාරනයට සහ යුක්‍රේනය, එක්සත් ජනපදය ප්‍රමුඛ මිලිටරි සන්ධානයට ඒකාබද්ධ කිරීම පිලිබඳ සාකච්ඡා ප්‍රතික්ෂේප කිරීම සම්බන්ධයෙන් රුසියානු ආන්ඩුව දැක්වූ ප්‍රතිචාරය යි.

වසර තුනක කාලය තුල යුද්ධයෙන් දෙපාර්ශ්වයේම ජීවිත ලක්ෂ ගනනක් අහිමි විය. කියුබානු මිසයිල අර්බුදයෙන් පසු, අන්කිසිදු අවස්ථාවකට වඩා ලෝකය න්‍යෂ්ටික යුද්ධයේ අද්දරට ගෙන එමින්, රුසියානු නගර ඉලක්ක කර ගැනීම සඳහා එක්සත් ජනපදය විසින් සපයන ලද දිගු දුර ආයුධ භාවිතා කිරීමට බයිඩන් පරිපාලනය එහි අවසාන සතිවලදී යුක්‍රේනයට අවසර දුන්නේය.

වැඩෙන දේශීය විරුද්ධත්වයකට මුහුන දෙමින්, ප්‍රජාතන්ත්‍රවාදී අයිතීන්ට එරෙහිව වෙන කවරදාටත් වඩා ම්ලේච්ඡ ප්‍රහාරයක් එල්ල කරමින් සිටින කියෙව්හි දක්ෂිනාංශික තන්ත්‍රය සමග සන්ධානගතව, එක්සත් ජනපදය හා නැටෝ බලවතුන් යුද්ධය දියත් කර ඇත. බොල්ෂෙවික්-ලෙනින්වාදීන්ගේ තරුන රැකවල (වයිජීබීඑල්) සංවිධානයේ ප්‍රමුඛ සාමාජිකයෙකු වන බොග්ඩාන් සයිරොටියුක්, යුක්‍රේන හා රුසියානු ආන්ඩු දෙකටම විරුද්ධ වීමේ සහ යුද්ධයට එරෙහිව කම්කරු පන්තිය එක්සත් කිරීමට සටන් කිරීමේ “අපරාධය” වෙනුවෙන් දැන් මාස අටක් තිස්සේ සිරගත ව සිටී.

ඊට සමගාමීව, එක්සත් ජනපදයේ සහ නැටෝ බලවතුන්ගේ පිටුබලය ඇතිව සහ මැද පෙරදිග ධනේශ්වර-ජාතිකවාදී පාලන තන්ත්‍රවල ආධාර සහ අනුබලය ඇතිව ගාසා තීරයට ඊශ්‍රායලයෙන් එල්ල වන ජන සංහාරක ප්‍රහාරය, අධිරාජ්‍යවාදී ම්ලේච්ඡත්වයේ ගැඹුර හෙලිදරව් කරයි.

සමස්ත නගරපිටින් විනාශ කිරීම, රෝහල් සහ පාසල් ඉලක්ක කිරීම සහ ලක්ෂ සංඛ්‍යාත ජනතාවක් අවතැන් කිරීම මගින් සනිටුහන් වූ ජන සංහාරය, පුලුල් කලාපීය මූලෝපායක කොටසකි. එහි අරමුන වන්නේ, සිරියාවේ අසාද් ආන්ඩුව පෙරලා දැමීම, හිස්බුල්ලා නායකත්වයේ හිස ගසා දැමීම සහ ඉරානයට එරෙහිව උත්සන්න වන ප්‍රකෝප කිරීම් ඇතුලු අධිරාජ්‍යවාදී අවශ්‍යතාවලට අනුකූලව මැද පෙරදිග ප්‍රතිසංවිධානය කිරීමයි.

ඇමරිකානු රාජ්‍යය තුල විදේශ ප්‍රතිපත්තිය සම්බන්ධයෙන් ගැටුම් පවතින තාක් දුරට, එය, අරමුනු සහ විධික්‍රමවලට වඩා භූගෝල විද්‍යාව සමඟ—එනම්, ලෝකයේ කුමන කලාපය අධිරාජ්‍යවාදී ආක්‍රමනයේ ක්ෂනික ඉලක්කය විය යුතුද යන්න සමග—සම්බන්ධ වේ. කෙසේ වෙතත්, එලැඹෙන පාලනතන්ත්‍රයේ කේන්ද්‍රීය අවධානය, ඇමරිකානු පාලක පන්තිය එහි මූලික ගෝලීය ප්‍රතිවාදියා ලෙස සලකන චීනය සමග ගැටුමකට සූදානම් වීම කෙරෙහි යොමු වනු ඇත.

මිලිටරිවාදයේ මෙම ගෝලීය පුපුරා යාම ඇමරිකානු ධනවාදයේ ගැඹුරු වන අර්බුදයෙන් වෙන් කල නොහැකි ය. “ඩොලරයේ ආධිපත්‍යය” පිලිබඳ ට්‍රම්ප්ගේ අවධාරනය ඉස්මතු කරන්නේ, එක්සත් ජනපද මූල්‍ය ප්‍රාග්ධනයේ ගෝලීය ආධිපත්‍යය පවත්වා ගැනීම සඳහා මිලිටරි ආක්‍රමනකාරීත්වය කෙතරම් දුරට භාවිතා කරනු ඇති ද යන්නයි. තීරුබදු, වෙලඳ යුද්ධ සහ ප්‍රතිවාදීන්ට සහ සහචරයින්ට එරෙහි තර්ජන—කැනඩාව “51 වැනි ප්‍රාන්තය“” ලෙස ඈඳා ගැනීම පිලිබඳ ට්‍රම්ප්ගේ ප්‍රකෝපකාරී ප්‍රකාශ මගින් නිදර්ශනය වන ආකාරයට—දිගු කාලීන ආර්ථික පරිහානිය හමුවේ ඇමරිකානු අධිරාජ්‍යවාදය සිය ආධිපත්‍යය පවත්වා ගැනීමට ඇති මංමුලා සහගත බව හෙලි කරයි.

පලමු ලෝක යුද්ධය සහ දෙවන ලෝක යුද්ධය අතර කාලපරිච්ඡේදය තුල, 1928 දී ලියොන් ට්‍රොට්ස්කි විසින් කරන ලද විශ්ලේෂනය, අදටත් දැවැන්ත බලයකින් අදාල වේ. ට්‍රොට්ස්කි මෙසේ ලිවීය:

අර්බුදකාරී කාල පරිච්ඡේදය තුල එක්සත් ජනපදයේ ආධිපත්‍යය උත්පාත කාලයට වඩා සම්පූර්නයෙන්ම, වඩාත් විවෘතව සහ වඩාත් නිර්දය ලෙස ක්‍රියාත්මක වනු ඇත. මෙය ආසියාවේ, කැනඩාවේ, දකුනු ඇමරිකාවේ, ඔස්ට්‍රේලියාවේ හෝ යුරෝපයේ ම සිදු වේද, නැතහොත් මෙය සාමකාමීව හෝ යුද්ධය හරහා සිදු වන්නේ ද යන්න නොතකා, එක්සත් ජනපදය මූලික වශයෙන් යුරෝපයේ වියදමින්, තම දුෂ්කරතා සහ ව්‍යාධීන් යටපත් කරගැනීමට සහ ඒවායින් මිදී ගැනීමට ප්‍රයත්න කරනු ඇත.

ඇමරිකානු අධිරාජ්‍යවාදයේ පිපිරීම, සියලුම ප්‍රධාන ධනේශ්වර රටවල් සහභාගී ව ලෝකයේ ගෝලීය අධිරාජ්‍යවාදී යලි බෙදීමක ගැනීමක් කරා ගමන් කිරීමේ කොටසකි. යුරෝපීය බලවතුන් ට්‍රම්ප්ගේ තේරී පත්වීමට ප්‍රතිචාර දක්වා ඇත්තේ, යුක්‍රේනය පිලිබඳ ප්‍රතිපත්ති වෙනස් කිරීමේ හැකියාව සහිතව —අවශ්‍ය ම නම් එක්සත් ජනපදයට එරෙහිව පවා යමින්—ස්වාධීන විදේශ ප්‍රතිපත්තියක අනුගමනය අවශ්‍යතාවය අවධාරනය කරමිනි. සම්පත්, වෙලඳපොලවල් සහ අමුද්‍රව්‍ය පාලනය කිරීමේ පොරය, පූර්ව යටත් විජිත රටවල් සියල්ල නැවත යටත් කර ගැනීම ඉලක්ක කර ඇත.

ගෝලීය යුද්ධය උත්සන්න කිරීම, ව්‍යසනකාරී ප්‍රතිවිපාක ඇතිකරමින් මානව වර්ගයා ගෝලීය වහ්නි ජාලාවක් තුලට ඇද දැමීමට තර්ජනය මතුකරයි. ඒ සමග ම, විදේශයන්හි යුද්ධය, රට තුල කම්කරු පන්තියට එරෙහි යුද්ධය දැවැන්ත ලෙස තීව්‍ර කිරීමේ අවශ්‍යතාව මතු කරයි. ෆොරීන් එෆෙයාර්ස් මෑතකදී විස්තර කලේ, “පූර්න යුද්ධයේ” නව යුගය, “ප්‍රතිමල්ලවයන් විශාල සම්පත් හිමිකර ගන්නා, ඔවුන් සිය සමාජයන් බලමුලු ගන්වන, අනෙකුත් සියලුම රාජ්‍ය ක්‍රියාකාරකම්වලට වඩා යුද්ධයට ප්‍රමුඛත්වය දෙන, විවිධ ඉලක්කවලට පහර දෙන සහ ඔවුන්ගේ සහ වෙනත් රටවල ආර්ථිකයන් ප්‍රතිනිර්මානය කරන යුගය යි.” එනම් මුලුමහත් සමාජයම යුද්ධයට යටත් විය යුතුය.

ධනවාදයේ අර්බුදය සහ පන්ති අරගලයේ වර්ධනය

අධිරාජ්‍යවාදී යුද්ධය යනු, සමස්ත ධනේශ්වර පර්යායේ වඩ වඩාත් නොවිසඳියහැකි බවට පත් වෙමින් යන අර්බුදයට පාලක පන්තියේ ප්‍රතිචාරයයි. පසුගිය දශක කිහිපය පුරා එන්ට එන්ටම වඩාත් ආන්තික ආර්ථික අර්බුද පුපුරා යාම යෝධ ධනය, මූර්ත වටිනාකම් නිෂ්පාදනයෙන් වඩ වඩාත් වියෝ වී ඇති මූල්‍ය කතිපයාධිකාරයේ පරපුටු භාවය සහ සාහසිකත්වය ගැඹුරු කර ඇත.

අනුප්‍රාප්තික අර්බුදවලට පාලක පන්තියේ ප්‍රතිචාරය වී ඇත්තේ, ඉතා මෑතක දී කොවිඩ්-19 වසංගතයේ පලමු වසර තුලදී කලාක් මෙන්, බැංකු සහ සංගතවල දැවැන්ත නය සැපයීම මගින් ඇපදීම් සැලසුම් කිරීමයි. මහජන සෞඛ්‍යයට වඩා සංගත ලාභවලට ප්‍රමුඛත්වය දෙන ධනේශ්වර ආන්ඩු කම්කරුවන්ගේ ජීවිත කෙරෙහි දක්වන මාරාන්තික උදාසීනත්වය වසංගතය විසින්,හෙලිදරව් කරනු ලැබ ඇත. මිලියන 30 කට අධික ජනතාවක්, මේ වන විට ගෝලීය වශයෙන් මරා දමා ඇත.ඉන් අතිමහත් බහුතරයක් කම්කරු පන්තියයි. අවම වශයෙන් මිලියන 500 ක ජනතාවක් දැන් දිගුකාලීන-කොවිඩ් හි බොහෝ විට කායිකව දුබලකරන බලපෑම් වලින් පීඩා විඳිති.

කෙසේ වෙතත්, පාලක පන්තියට නම් එක්සත් ජනපදය ප්‍රමුඛ ලෝක ආන්ඩු ඩොලර් ට්‍රිලියන ගනනක් කොටස් වෙලඳපොලවල් වෙත මුදා හැරීම නිසා එය මූල්‍යමය ගජ වාසියක් පමනි. මෙම ක්‍රියාවන් වෙලඳපොලවල් තාවකාලිකව ස්ථාවර කලද, එම පියවරයන් ධනේශ්වර ක්‍රමයේ පදනමෙහි පවතින ප්‍රතිවිරෝධතා විසඳීමට අසමත් විය. ඊට විපරීතව සිදුවී ඇත්තේ, වඩා විශාල සමපේක්ෂන සහ නය මට්ටම් අවුලුවාලමින්, වඩාත් ව්‍යසනකාරී කඩාවැටීමකට වේදිකාව සැකසීමයි.

මෙය අතිශයින් ම පැහැදිලිවී ඇත්තේ, බිට්කොයින් සහ අනෙකුත් ක්‍රිප්ටොකරන්සි මුදල් වැනි සමපේක්ෂන මූල්‍ය මෙවලම්වල නැගීම මගිනි; එහි සමස්ත වෙලඳපල වටිනාකම දැන් ඩොලර් ට්‍රිලියන 3.26 ක් වේ. 2024 දෙසැම්බරයේ දී, එක් බිට්කොයින් එකක මිල ඩොලර් 100,000 ඉක්මවා ගිය අතර, ඉදිරි මාසවලදී එහි “අගය” දෙගුනයක්, තුන් ගුනයකින් හෝ හතර ගුනයකින් වැඩි වනු ඇතිබව සිතිය හැක. ඇත්ත වශයෙන්ම, ෆෙඩරල් රිසර්ව් බැංකුව විසින් සමපේක්ෂකයින්ට තවත් ඩොලර් ට්‍රිලියන ගනනක නය මුදා හැරීමක් මගින් ඇපදීමක් අවශ්‍ය කරවන අයුරින් සමස්ත ක්‍රිප්ටෝ පොන්සි ස්කීම් (ponzi scheme - නව ආයෝජකයින් විසින් දායක කරන ලද අරමුදල් වලින් දැනට සිටින ආයෝජකයින්ට අපේක්ෂිත ප්‍රතිලාභ ගෙවීම සම්බන්ධ ආයෝජන වංචාවකි) බිඳ වැටීමටද බොහෝ දුරට ඉඩ ඇත.

ෆිනෑන්ෂල් ටයිම්ස් හි මෑත වාර්තාවක් හෙලි කලේ, 2010 වසරේ සිට එක්සත් ජනපද ක්‍රෙඩිට් කාඩ් නය පැහැර හැරීම් ඒවායේ ඉහලම මට්ටම්වලට ගොස් ඇති බවයි. මූල්‍ය අස්ථාවරත්වයේ වර්ධනය සනිටුහන් කරමින්, උත්තෝලන නය (leveraged loans) පැහැර හැරීම් වසර හතරක් තුල ඒවායේ ඉහලම අනුපාතයට ලඟා වී තිබේ. මේ අතර, එක්සත් ජනපදයේ ජාතික නය ඩොලර් ට්‍රිලියන 36 ඉක්මවයි.

පුවත්පත් විසින් සුපිරි-ධනවතුන් තවදුරටත් පොහොසත් කිරීම සඳහා සතුටුදායක අපේක්ෂාවන් හුවා දක්වන මුත්, ජනගහනයේ පුලුල් මහජනතාව සඳහා යථාර්ථය බෙහෙවින් වෙනස් ය: පුලුල් මහජනතාව සඳහා යථාර්ථය නම්, ඉහල යන ජීවන වියදම්, එකතැන පල්වෙන වැටුප් සහ කඩා වැටෙන රාජ්‍ය සේවාවන් ය. එක්සත් ජනපදය තුල:

• 2019 සහ 2023 අතර, කුලී වියදම් රට පුරා සියයට 30.4 කින් වැඩි වී ඇති අතර, කුලී නිවැසියන්ගෙන් අඩකට ආසන්න ප්‍රමානයකට “පිරිවැය බර” පැටවී ඇත. 2024 සමීක්ෂනයකින් හෙලි වූයේ, කුලී නිවැසියන්ගෙන් පහෙන් එකකට වඩා වැඩි පිරිසක් තම මුලු ආදායම කුලිය වෙනුවෙන් වියදම් කල බවත්, බොහෝ දෙනෙක් ද්විතීය රැකියා (සියයට 20), පවුලේ සහයෝගය (සියයට 14) මත හෝ කල්පිරීමට පෙර ආපසු ගත් විශ්‍රාම ඉතුරුම් (සියයට 12) මත යැපුනු බවත් ය.

ඉසෙඩ් පරම්පරාවේ (1990 දශකයේ අග භාගයේ සහ 2010 දශකයේ මුල් භාගය අතර උපත ලද, අන්තර්ජාලය සමඟ ඉතා හුරුපුරුදු අය ලෙස සැලකෙන පුද්ගලයින් කන්ඩායම) සියයට 31 ක් ඇතුලුව වාර්තාගත තරුන ඇමරිකානුවන් සංඛ්‍යාවක්, දැරිය නොහැකි නිවාස කුලී හේතුවෙන් ඔවුන්ගේ වැඩිහිටියන්, දෙමාපියන් හෝ ආච්චිලා සීයලා සමඟ ජීවත් වෙති. වැඩිවන වියදම් සහ ශිෂ්‍ය නය බරින් මිරිකුනු තරුන-වැඩිහිටියන්ගෙන් හතරෙන් එකක් දැන් ජීවත් වන්නේ පරම්පරා කිහිපයක අය ජීවත් වන කුටුම්භවල ය.

• 2024 දී නිවාස නොමැති අය වාර්තාගත 770,000 ක් විය, එය 2023 සිට සියයට 18.1ක වැඩිවීමකි; 150,000 කට ආසන්න දරුවන් එක් රාත්‍රියක් තුල හෝ නිවාස නොමැතිකම අත්විඳ තිබේ—එය පෙර වසරට වඩා සියයට 33 ක වැඩිවීමකි.

• 2024 නොවැම්බර් මාසයේදී නිල විරැකියාව මිලියන 7.1 දක්වා ඉහල ගිය අතර තවත් මිලියන 4.5 ක් ඌන සේවා නියුක්තිකයන් (හැකියාවට සරිලන රැකියා නැති අය) සහ මිලියන 5.5 ක් ශ්‍රම බලකාය හැර ගොස් ඇත.

ලෝක බැංකුවට අනුව, මිලියන 700 කට ආසන්න ජනතාවක් (හෝ ලෝක ජනගහනයෙන් සියයට 8.5 ක්) “අන්ත දරිද්‍රතාවයේ” ජීවත් වෙති. එය දිනකට ඩොලර් 2.15 ට අඩු ආදායමක් ඇති අය ලෙස අර්ථ දක්වා ඇත. බිලියන 3.5 ක ජනතාවක් (මනුෂ්‍ය සංහතියෙන් සියයට 44 ක්) ජීවත් වන්නේ, දිනකට ඩොලර් 6.85 කට වඩා අඩු මුදලකිනි.

මෙම කොන්දේසි, සමාජ විරෝධයේ සැලකිය යුතු ප්‍රකාශනයන් ජනනය කරමින් පවතී. එක්සත් ජනපදයේ, 2023 දී කම්කරුවන් 450,000 කට වඩා “ප්‍රධාන වැඩ නැවත්වීම්' වලට” සම්බන්ධ වූ අතර, එය පෙර වසරට වඩා සියයට 280 ක වැඩිවීමක් සහ පූර්ව වසංගත මට්ටම් කරා ආපසු යාමකි. මෙම වැඩ වර්ජන කර්මාන්ත හා වෘත්තීන් පුරා පැතිර ගියේය; වාහන කම්කරුවන්, හොලිවුඩ් ලේඛකයින් සහ නලුවන්, හෙදියන් සහ රජයේ පාසල් ගුරුවරුන් සම්බන්ධ විය. බෝයිං ගුවන් යානා කම්කරුවන්, අධ්‍යයන සේවකයින්, විදුලි සංදේශ සේවකයින් සහ ඇමසන් සහ ස්ටාර්බක්ස් කම්කරුවන් විසින් සිදුකල වර්ජන ද ඇතුලුව 2024 දී පන්ති අරගලයේ වර්ධනය දිගටම පැවතුනි.

පසුගිය වසර පුරා ආර්ජන්ටිනාවේ, ගිනියාවේ සහ නයිජීරියාවේ කම්කරුවන් ඔවුන්ගේ ජීවනෝපායට තර්ජනයක් වූ කප්පාදු පියවරයන්ට එරෙහිව බල සම්පන්න මහා වැඩවර්ජන දියත් කලහ. මිලියන ගනනක් තරුනයෝ කප්පාදුවට එරෙහිව කෙන්යාවේ “ඉසඩ් පරම්පරාවේ විරෝධතාවන්” හිදී ද, පසුව බොහෝ කර්මාන්තවල කම්කරුවන් සම්බන්ධ වැඩ වර්ජන රැලි වලදී ද විරෝධතා දැක්වූහ. ග්‍රීසියේ හා ඉතාලියේ කම්කරුවන් පුද්ගලීකරනයට, වැටුප් කප්පාදුවට සහ සමාජ ආරක්ෂනයන්ගේ ඛාදනයට එරෙහි මහජන විරෝධතා තුලින් ආර්ථිකයේ ප්‍රධාන අංශ වසා දැමූහ. වඩා හොඳ වැටුප් හා කොන්දේසි ඉල්ලා රාජ්‍ය අංශයේ කම්කරුවන් 150,000 ක් වැඩ නැවැත්වීමත් සමඟ, අඩ සියවසකට වැඩි කාලයක් තුල විශාලතම වැඩ වර්ජනය උතුරු අයර්ලන්තය අත්දුටුවේය.

ආසියාව පුරා, දකුනු කොරියාවේ මාර්ගස්ථ සේවකයින් සහ සැම්සුන් සේවකයින් සහ ශ්‍රී ලංකාවේ දුම්රිය සේවකයින් ඇතුලු ප්‍රධාන කර්මාන්තවල සැලකිය යුතු වැඩ වර්ජන පුපුරා ගියේය. චිලියේ තඹ පතල් කම්කරුවන්ගේ සහ බ්‍රසීලයේ වරාය සේවකයන්ගේ වැඩ වර්ජන, ධනේශ්වර සූරාකෑමට එරෙහි වීමට ලතින් ඇමරිකාවේ කම්කරුවන්ගේ අධිෂ්ඨානය ඉස්මතු කලේය. මෙක්සිකෝවේ වානේ සහ මෝටර් රථ කම්කරුවෝ ජාත්‍යන්තර සංගත විසින් පනවන ලද අඩු වැටුප් හා කොන්දේසි වලට එරෙහිව සටන් කලහ.

තුර්කියේ, ලෝහ කම්කරුවන් සහ පතල් කම්කරුවන් තම වැටුප් හා සේවා කොන්දේසි ආරක්ෂා කර ගැනීම සඳහා සටන්කාමී අරගලවල නිරත වූහ. ජර්මනියේ, ලුෆ්තන්සා සහ ෆො ක්ස්වැගන් හි වැඩවර්ජන, යුරෝපයේ විශාලතම ආර්ථිකයේ කම්කරුවන්ගේ වැඩෙන අතෘප්තිය හෙලිදරව් කලේය. බ්‍රිතාන්‍යය දුම්රිය හා ගුවන් තොටුපල අංශ හරහා මහජන ක්‍රියාමාර්ග අත්දුටු අතර වරාය, දුම්රිය හා රාජ්‍ය අංශයේ වැඩ වර්ජනවලින් ප්‍රංශය සොලවා දැමුනි.

කැනඩාවේ, දහස් ගනන් සස්කැච්වන් අධ්‍යාපනඥයින් මෙන්ම දුම්රිය, වරාය සහ කැනඩා තැපැල් සේවකයෝ ද වැඩ වර්ජනවලට සම්බන්ධ වූහ. මෙම අරගලවලට ටෲඩෝ ආන්ඩුවෙන් දැඩි විරෝධයක් එල්ල වූ අතර, එය වොෂින්ටනය සමග සම්බන්ධීකරනයෙන්, වැඩ වර්ජන තලා දැමීමට නැවත නැවතත් මැදිහත් විය.

සංගත සහ රාජ්‍ය අවශ්‍යතා සමග පෙලගැසී සිටින වෘත්තීය සමිති නිලධරය, කම්කරුවන්ගේ ව්‍යාපාර වල තිරිංග ලෙස ක්‍රියා කරති. නැවත නැවතත් වෘත්තීය සමිති යාන්ත්‍රනය වැඩ වර්ජන යටපත් කිරීමටත්, අරගල හුදකලා කිරීමටත්, සාමාන්‍ය කම්කරුවන්ගේ අවශ්‍යතා පාවා දෙන කොන්ත්‍රාත්තු පැනවීමටත් කටයුතු කර ඇත.

එක්සත් ජනපදයේ, ජාත්‍යන්තර යන්ත්‍රෝපකරන ශිල්පීන්ගේ සංගමය (අයිඒඑම්) පසුගිය වසරේ මාස දෙකක බෝයිං වර්ජනය කඩාකප්පල් කර, කම්කරුවන් 33,000 ක් හුදකලා කර, වර්ජනය නතර කිරීමට පෙර, ප්‍රමානවත් නොවන වැඩ වර්ජන දීමනා දෙමින් ඔවුන් හෙම්බත් කලේ ය. යූඒඩබ්ලිව් සභාපති ෂෝන් ෆේන් විරුද්ධත්වය මැඩපවත්වා වෙලඳ ප්‍රතිපත්ති සම්බන්ධයෙන් ට්‍රම්ප් සමග සහයෝගීතාවයට ප්‍රතිඥා දුන් බැවින්, යුනයිටඩ් ඔටෝ වර්කර්ස් (යූඒඩබ්ලිව්) සැබෑ වැඩවර්ජන වෙනුවට, ව්‍යාජ “වර්ජන” ව්‍යාපාරයක් දියත් කලේය. නැව් තටාකාංගන සම්බන්ධයෙන්, ජාත්‍යන්තර ලෝන්ග්ෂෝර්මන් සංගමය (අයිඑල්ඒ) ඔක්තෝබර් මාසයේදී 40,000 ක කම්කරුවන්ගේ දින තුනක වැඩ වර්ජනයක් ඉක්මනින් අවසන් කරමින්, ධවල මන්දිරයේ දින 90 ක තැරැව්කාර දීර්ඝ කිරීමක් යටතේ ඔවුන් ආපසු යැවීය.

කැනඩාවේ තැපැල් සේවකයින් 55,000 කගේ මාසයක වැඩ වර්ජනයකින් පසුව, කැනේඩියානු තැපැල් සේවක සංගමය (සීයූපීඩබ්ලිව්) සහ කැනේඩියානු කම්කරු කොංග්‍රසය කම්කරු ඇමති ස්ටීවන් මැකිනන් විසින් පනවන ලද ආන්ඩුවේ වැඩ වර්ජන තහනමකට යටත් කලේය. වැටුප් වැඩි කිරීම, රැකියා සුරක්ෂිතභාවය හෝ නව තාක්ෂනයන් පාලනය කිරීම සඳහා කම්කරුවන්ගේ ඉල්ලීම් කිසිවක් ඉටු නොවීය.

සෑම අරගලයක්ම, කම්කරුවන් විසින්ම පාලනය කරනු ලබන නව සංවිධාන, එනම්, ක්‍රියාකාරී කමිටු වර්ධනය කිරීම හරහා බලය සාමාන්‍ය කම්කරුවන් අතට මාරු කර, සමස්ත කම්කරු පන්තියේ එක්සත්, ගෝලීය ව්‍යාපාරයකට නායකත්වය දීමේ අවශ්‍යතාවය මතු කරයි.

විප්ලවයේ දශකය තුල ට්‍රොට්ස්කිවාදය සඳහා සටන

මානව වර්ගයා දශකයේ දෙවන භාගයට පිවිසෙන විට, සමාජවාදී විප්ලවය සඳහා වෛෂයික කොන්දේසි අසාමාන්‍ය වේගයකින් මෝරමින් තිබේ. ගෝලීය ධනවාදය විසින් නිර්මානය කරන ලද කොන්දේසි—අධිරාජ්‍යවාදී යුද්ධය, අති විශාල අසමානතාවය, දේශගුන ව්‍යසනය සහ ආඥාදායකත්වයේ තර්ජනය—මිලියන ගනනක් කම්කරුවන් හා තරුනයින් අරගලයට තල්ලු කරයි.

නූතන ඉතිහාසයෙන් උගත යුතු නිශ්චිත පාඩම් නම්, ඒ දැන්, එක්සත් ජනපදයේ සහ ගෝලීය වශයෙන් පවතින ධන අසමානතාවයේ මට්ටම් සෑම විටම සමාජ පිපිරීම් ඇති කරන බව යි. එහෙත් පැහැදිලි වැඩපිලිවෙලක්, සංවිධානයක් සහ නායකත්වයක් නොමැතිව මෙම අරගල සාර්ථක විය නොහැකි බව ද ඉතිහාසය පෙන්නුම් කරයි.

ට්‍රොට්ස්කිගේ මූලික කෘතියක් වන ඔක්තෝබරයේ පාඩම් ප්‍රකාශනය මත, රුසියානු කොමියුනිස්ට් පක්ෂය තුල ඇති වූ ගැටුම පුපුරා ගොස් ගතවී ඇත්තේ යන්තම් සියවසකට වැඩි කාලයකි. නිලධාරිවාදයට එරෙහිව වාම විපාර්ෂවයේ අරගලය මත පදනම් වූ ට්‍රොට්ස්කිගේ විශ්ලේෂනය, ස්ටැලින්වාදීන්ගෙන් උමතු ප්‍රතිචාරයක් මතු කලේය. මෙම ප්‍රහාර වලට එරෙහිව, ට්‍රොට්ස්කි තමන් ව ආරක්ෂා කරගැනීමේ දී කේන්ද්‍රීය ප්‍රශ්න දෙකක් මතු විය, ඒවා නම්, (1) 1917 ඔක්තෝබර් මාසයේදී බොල්ෂෙවික්වරුන්ගේ ජයග්‍රහනය කල හැකි වූයේ ජාත්‍යන්තර මූලෝපායක පදනම මත පමනි; සහ (2) වෛෂයික තත්වය වඩාත් වර්ධනය වන තරමට, “ආත්මීය සාධකය” වන විප්ලවවාදී නායකත්වයේ භූමිකාව වඩාත් තීරනාත්මක වේ.

කම්කරු පන්තිය තුල විප්ලවවාදී නායකත්වයේ අනතුර ගැන පාලක පන්තිය දනී. සමාජවාදය පිලිබඳ ට්‍රම්ප්ගේ උමතු හෙලාදැකීම්, කම්කරු පන්තිය තුල නැගෙන කෝපය, කම්කරුවන්ගේ අවශ්‍යතා ප්‍රකාශ කරන වැඩපිලිවෙලක් හා ඉදිරිදර්ශනයක් සමග අන්තර්ඡේදනය වේ යැයි යන භීතිය ප්‍රකාශයට පත් කරයි. ට්‍රොට්ස්කිවාදයේ “අනතුරට” එරෙහිව සටන් කිරීම සඳහා ශාස්ත්‍රාලීය ස්ථරයන් විසින් දැවැන්ත සම්පත් කැප කරනු ලැබ ඇත.

නිදසුනක් වශයෙන්, බ්‍රිතාන්‍ය ශාස්ත්‍රාලිකයෙකු වන ජෝන් ඊ. කෙලී, 2023 සිය ට්‍රොට්ස්කිවාදයේ සන්ධ්‍යාභාගය නමැති ග්‍රන්ථයේ ලියන්නේ, “එහි සියවසක පමන උත්සාහය නොතකා, කිසි දිනෙක කිසි තැනක ක්‍රියාත්මක නොවූ, බැරෑරුම් රැඩිකල් දේශපාලනයෙන් ඈත්වුනු, ට්‍රොට්ස්කිවාදී නායකත්වයෙන් යුත් විප්ලවවාදී දල සටහන, දේශපාලන ශක්තිය හා සම්පත් ඛේදනීය හා නාස්තිකාර ලෙස නොමග යැවීමකට සමාන වේ,” යනුවෙනි. “'මාක්ස්වාදයේ ඇත්තේ එකම එක ධාරාවක් පමනි: ට්‍රොට්ස්කිවාදය 21 වැනි සියවසේ මාක්ස්වාදයයි,' සහ 'ට්‍රොට්ස්කිවාදී විශ්වය තුල ඇත්තේ එකම එක අව්‍යාජ ට්‍රොට්ස්කිවාදී පක්ෂයක් පමනි'” යන හතරවන ජාත්‍යන්තරයේ ජාත්‍යන්තර කමිටුවේ “අවිනීත සහ අහංකාර” ප්‍රකාශ කෙලී හෙලා දකී.

කෙලී සහ ධනේශ්වර ක්‍රමයේ අනෙකුත් ආරක්ෂකයින් සඳහා “බැරෑරුම්” දේශපාලනය යනු, එක්සත් රාජධානියේ ජෙරමි කෝබින්ගේ සහ ලොව පුරා සිටින ඒ හා සමාන සංවිධාන සහ පුද්ගලයන්ගේ ප්‍රතිසංස්කරනවාදී පල්හෑලි වේ. මේ ආකාරයේ දේශපාලනය නිෂ්පාදනය කර ඇත්තේ කුමක්ද? කම්කරු පක්ෂය “ප්‍රතිසංස්කරනය” කිරීමට කෝබින් දරන උත්සාහය, යුරෝපයේ අධිරාජ්‍යවාදී යුද්ධයේ සහ රට තුල කම්කරු පන්තියට එල්ල කරන ප්‍රහාරයේ ඉදිරි පෙලේ සිටින සර් කීර් ස්ටාර්මර්ගේ ආන්ඩුව බිහිකර ඇත.

එක්සත් ජනපදයේ බර්නි සැන්ඩර්ස්, ඇමරිකාවේ ඩිමොක්‍රටික් සමාජවාදීන්ගේ නියෝජිත ඇලෙක්සැන්ඩ්‍රියා ඔකාසියෝ-කෝර්ටෙස් සහ ඔවුන්ගේ අය, ට්‍රම්ප් යලි තේරී පත්වීම සඳහා කොන්දේසි නිර්මානය කරමින්, ඩිමොක්‍රටික් පක්ෂයේ යුද-ගැති සහ සංගත-ගැති න්‍යාය පත්‍රයට සහයෝගය දැක්වීම සඳහා මහජන අතෘප්තිය හරවා යවා ඇත. ප්‍රන්සයේ ජීන්-ලුක් මෙලන්චොන්, ග්‍රීසියේ සිරිසා, ජර්මනියේ වාම පක්ෂය, ස්පාඤ්ඤයේ පොඩෙමෝස් සහ තවත් බොහෝ අය කම්කරු පන්තියේ විරුද්ධත්වය පාලනය කිරීමට සහ උදාසීන කිරීමට උත්සාහ කර ඇති අතර එය පාලක පන්තියේ සංස්ථාපිත පක්ෂවලට යටත් කර ඇත.

ට්‍රොට්ස්කි, ඔහුගේ කාලයේ ජෝන් කෙලීලාට ප්‍රතිචාර දක්වමින්, 1939 අප්‍රේල් මාසයේදී මෙසේ සඳහන් කලේය:

ධනවාදයේ පදනම් ආරක්ෂා කිරීමට තමන්ගෙන් ඉල්ලා සිටින බව ඔවුන්ට හැඟුනද, දේවල ස්වභාවයෙන්ම, ප්‍රතිසංස්කරනවාදීන්, ආර්ථික පොලිස් පියවරයන් සමඟ එහි නීති භාවිතා කිරීමට තමන් බල රහිත බව ඔප්පු කරති. එවිට ඔවුන්ට සදාචාර සම්පන්න වීම හැර වෙන කුමක් කල හැකිද? නිව් ඩීල් ( 1929 දී ආරම්භ වූ මහා අවපාතයට ආමන්ත්‍රනය කිරීමේ අරමුනින් 1933 සහ 1938 අතර එක්සත් ජනපදයේ ජනාධිපති ෆ්‍රෑන්ක්ලින් ඩී රූස්වෙල්ට් විසින් පනවන ලද ගෘහස්ථ වැඩසටහන්, පොදු වැඩ ව්‍යාපෘති සහ මූල්‍ය ප්‍රතිසංස්කරන සහ රෙගුලාසි මාලාවකි) හි අනෙකුත් කැබිනට් සාමාජිකයින් සහ ප්‍රචාරකයන් මෙන් ඉක්ස් මහතා ද විනීතභාවය සහ ප්‍රජාතන්ත්‍රවාදයේ මූලධර්ම අමතක නොකරන ලෙස ඒකාධිකාරීන්ගෙන් ඉල්ලා සිටී. වැස්ස ඉල්ලා යාච්ඤා කිරීමට වඩා මෙය හොඳ වන්නේ කෙසේද?

ලොව පුරා ෆැසිස්ට්වාදය ප්‍රවර්ධනය කිරීම හරහා තම අතිමහත් ධනය ආරක්ෂා කරන මස්ක් වැන්නන්ට, සමාජ ප්‍රතිසංස්කරන පිලිගැනීමට බල කල හැකි බව පිලිගැනීම තරම් බංකොලොත් ඉදිරිදර්ශනයක් තවත් ඇති ද? එපමනක් නොව, කතිපයාධිකාරීන්ගේ ධනය මුලුමනින් ම බැඳී ඇත්තේ සමාජ හා ආර්ථික පද්ධතියක් වන ධනවාදය සමග ය.

මානව වර්ගයා මුහුන දෙන අර්බුදයට එකම ශක්‍ය ප්‍රතිචාරය වන්නේ කම්කරු පන්තියේ විප්ලවවාදී බලමුලු ගැන්වීම පමනි. සමාජයේ කතිපයාධිකාරී ස්වභාවය, “ධනපතියන්ගේ වෙන් වෙන් කන්ඩායම්වල ධනය අත්පත් කර ගැනීම” සඳහා හතරවන ජාත්‍යන්තරයේ ආරම්භක වැඩපිලිවෙල තුල ට්‍රොට්ස්කි විසින් මතු කරන ලද ඉල්ලීමේ හදිසි භාවයට සාක්ෂි දරයි. මෙය සඳහා සටන් කල යුත්තේ, ධනේශ්වර කතිපයාධිකාරයට එරෙහිව ලෝක පරිමානයෙන් කම්කරු පන්තිය බලමුලු ගැන්වීම හරහා ය.

ලෝක සමාජවාදී විප්ලවය සඳහා අරගලයේ දී කම්කරු පන්තියේ විප්ලවවාදී විභවය මුදා හැරීමට ප්‍රකාශ කරන සහ සටන් කරන එකම පක්ෂය හජාජාක යි. රුසියානු විප්ලවයේ සිට ස්ටැලින්වාදයට එරෙහිව ට්‍රොට්ස්කිගේ සටන දක්වා මාක්ස්වාදයේ ශ්‍රේෂ්ඨ සම්ප්‍රදායන් තුල මුල් බැසගත් ජාත්‍යන්තර කමිටුව, ධනවාදය පෙරලා දැමීමට අවශ්‍ය පැහැදිලිකම හා සංවිධානය සමග කම්කරු පන්තිය සන්නද්ධ කිරීමට කැපවී සිටී.

කම්කරු ක්‍රියාකාරී කමිටුවල ජාත්‍යන්තර සන්ධානය ගොඩනඟමු!

පන්ති අරගලය වර්ධනය කිරීමෙන් මිස සමාජවාදය සාක්ෂාත් කරගත නොහැක. සමාජවාදය සඳහා දේශපාලන පදනම සකසන විප්ලවය, එක්සත් ජනපදයේ හා ජාත්‍යන්තරව කම්කරු පන්තිය විසින් සිය අවශ්‍යතා ඉදිරියට ගෙනයාමට සහ එහි අයිතීන් ආරක්ෂා කිරීමට ගෙන යන අසංඛ්‍යාත අරගල තුල සූදානම් කරනු ලැබේ.

2025 දී හජාජාක සහ එහි ශාඛාවල වැඩවල දී කේන්ද්‍රීය වන්නේ, ධනේශ්වර කතිපයාධිකාරයේ නියෝගවලට ගෝලීය විරුද්ධත්වය සඳහා සම්බන්ධීකරන මර්මස්ථාන ලෙස කක්‍රික-ජාස ගොඩනැගීමයි.

ජාත්‍යන්තර කම්කරු පන්තිය යනු ධනේශ්වර සමාජයේ සියලු වටිනාකම්වල උල්පත වන පෘථිවියේ බලවත්ම හා දැවැන්ත සමාජ බලවේගයයි. ස්ටැටිස්ටා (Statista - ගෝලීය ඩිජිටල් ආර්ථිකය, පාරිභෝගික වෙලඳපල සහ මහජන මතය ඇතුලු විවිධ මාතෘකා පිලිබඳ දත්ත සහ සංඛ්‍යාලේඛන සපයන ජර්මානු ඔන්ලයින් වේදිකාවකි) ට අනුව, 2024 දී සමස්ත ගෝලීය ශ්‍රම බලකාය දල වශයෙන් බිලියන 3.5 ක් වූ අතර එය 1991 බිලියන 2.23 සිට සියයට 55 කට වඩා වැඩි වීමකි. මෙයට සේවා කම්කරුවන් බිලියන 1.65 ක්, කෘෂිකාර්මික කම්කරුවන් මිලියන 873 ක් සහ කාර්මික කම්කරුවන් මිලියන 758 ක් ඇතුලත් වේ.

දැනට චීනයේ මිලියන 800 කට ආසන්න කම්කරුවන් සංඛ්‍යාවක්, ඉන්දියාවේ කම්කරුවන් මිලියන 600 ක්, එක්සත් ජනපදයේ මිලියන 170 ක් සහ ජර්මනියේ මිලියන 44 ක් පමන සිටිති. අප්‍රිකාවේ, ආසියාවේ සහ ලතින් ඇමරිකාවේ, මිලියන 10 කට අධික ජනතාවක් වෙසෙන නාගරික මධ්‍යස්ථාන සහ මහා නගරවල සංකේන්ද්‍රනය වූ දැවැන්ත හා ප්‍රධාන වශයෙන් තරුන කම්කරු පන්තියක් ඇත. එය, ඉන්දුනීසියාවේ කම්කරුවන් මිලියන 140 ක්, බ්‍රසීලයේ මිලියන 108 ක්, පකිස්ථානයේ මිලියන 80 ක්, නයිජීරියාවේ මිලියන 75 ක්, බංග්ලාදේශයේ මිලියන 74 ක් සහ ඉතියෝපියාවේ මිලියන 61 ක් ලෙස ගනන් බලා ඇත.

.

ජාත්‍යන්තර කම්කරු පන්තිය ගෝලීය නිෂ්පාදන ක්‍රියාවලිය තුල වෛෂයිකව එක්සත් වී ඇති අතර, ලාභයේ අවශ්‍යතා සඳහා ලොව පුරා කම්කරුවන් සූරාකන ජාත්‍යන්තර සංගත සහ බෙදාහැරීමේ ජාලයන්, ඔවුන් මත ආධිපත්‍යය දරයි. කම්කරු පන්තියේ ඒකාබද්ධ කාර්මික ප්‍රහාරයක් වර්ධනය වීම රඳා පවතින්නේ කම්කරුවන් විසින්ම පාලනය කෙරෙන කම්කරු පන්ති අරගලයේ සංවිධාන පිහිටුවීම මත ය.

2021 අප්‍රේල් මාසයේදී හතරවන ජාත්‍යන්තරයේ ජාත්‍යන්තර කමිටුව (හජාජාක) විසින් කම්කරු ක්‍රියාකාරී කමිටුවල ජාත්‍යන්තර සංධානය (කක්‍රික-ජාස) පිහිටුවීම, ජාතික හා කාර්මික සීමාවන් ඉක්මවා යමින් කම්කරු පන්තිය එක්සත් කිරීමේ සටනේ තීරනාත්මක පියවරක් සනිටුහන් කලේය.

පන්ති අරගලයේ මෙවලම් ලෙස වෘත්තීය සමිති පුනර්ජීවනය කල හැක්කේ, නිලධාරි තන්ත්‍රය අතින් බලය උදුරාගෙන සාමාන්‍ය කම්කරුවන් වෙත පැවරෙන තරමට පමනි. ජාත්‍යන්තර කමිටුව 2021 දී පැහැදිලි කල පරිදි:

මහජන අරගලය සඳහා නව මංපෙත් නිර්මානය කල යුතුය. මීට වසර 80 කට පෙර, පවතින වෘත්තීය සමිති සංවිධානවල පරිහානිය අදට වඩා බෙහෙවින් අඩුදියුනු වූ ඉතිහාසයේ අවස්ථාවක—ලෝක සමාජවාදී විප්ලවයේ ශ්‍රේෂ්ඨතම මූලෝපායඥයා වන—ලියොන් ට්‍රොට්ස්කි හතරවන ජාත්‍යන්තරයේ කර්තව්‍යය, “වෘත්තීය සමිතිවල ගතානුගතික මෙවලම්වලින් සෘජුවම බිඳී යාමක් හමුවේ පවා නොසැලී සිටිමින්, හැකි සෑම අවස්ථාවකදීම ධනේශ්වර සමාජයට එරෙහි මහජන අරගලයේ කර්තව්‍යයන්ට සමීපව අනුරූප වන ස්වාධීන සටන්කාමී සංවිධාන නිර්මානය කිරීම,” බව ලිවීය.

ගෝලීය වශයෙන් අන්තර් සම්බන්ධිත ක්‍රියාකාරී කමිටු ජාලය වර්ධනය කිරීමේ සටන වෘත්තීය සමිති පවතින කර්මාන්තශාලා, පාසල් සහ සේවා ස්ථානවලට සීමා නොවේ. ඇත්ත වශයෙන්ම, වර්තමාන වැඩබිම්වලින් අතිමහත් බහුතරයක වෘත්තීය සමිති නොමැත. මෙම සමාජ සත්‍යයේ අර්ථය වන්නේ, අසංඛ්‍යාත සේවා ස්ථාන වල ප්‍රායෝගික සංවිධානයේ ආරම්භක සහ එකම ආකාරය ලෙස ක්‍රියාකාරී කමිටු මතුවන බවයි.

කක්‍රික-ජාස කම්කරුවන්ට තොරතුරු බෙදා ගැනීමට, සාමූහික ක්‍රියා සැලසුම් කිරීමට සහ සූරාකෑමට, කප්පාදුවලට සහ යුද්ධයට එරෙහිව ඒකාබද්ධ ප්‍රහාරයක් දියත් කිරීමට රාමුවක් ලෙස වර්ධනය කල යුතුය. කම්කරුවන් එකිනෙකාට එරෙහිව බෙදීම සඳහා පාලක පන්තිය විසින් යොදා ගන්නා සියලු ආකාරයේ ජාතික ස්වෝත්තමවාදයට සහ සංක්‍රමන විරෝධී උද්ඝෝෂනවලට එය විරුද්ධ විය යුතුය. එය, ට්‍රම්ප් පරිපාලනයේ සහ ලොව පුරා අන්ත දක්ෂිනාංශික ආන්ඩුවල මහා පිටුවහල් කිරීමේ මෙහෙයුම් වලට කම්කරු පන්තියේ විරුද්ධත්වය සංවිධානය කල යුතුය.

කම්හල්වල, පාසල්වල සහ සේවා ස්ථානවල කම්කරුවන් විසින් ස්වාධීනව පිහිටුවන ලද ක්‍රියාකාරී කමිටු, කම්කරුවන්ට ප්‍රජාතන්ත්‍රවාදීව සංවිධානය වීමට, තමන්ගේ ඉල්ලීම් තහවුරු කිරීමට සහ ලොව පුරා කම්කරුවන්ගේ අරගල සමඟ ඔවුන්ගේ අරගල සම්බන්ධ කිරීමට හැකි මාධ්‍යයන් වේ.

පසුගිය වසර පුරා, වෘත්තීය සමිති නිලධරයන්ගේ පාවාදීම්වලට අභියෝග කිරීමට සහ කම්කරුවන්ගේ ඉල්ලීම් ඉදිරියට ගෙන යාමට තීරනාත්මක කර්මාන්තවල—සැපයුම්, මෝටර් රථ නිෂ්පාදන, අධ්‍යාපනය සහ සෞඛ්‍ය සේවාවල—ක්‍රියාකාරී කමිටු මතුවී ඇත. මෙම කමිටු, සංගතවල සූරාකෑමට, අනාරක්ෂිත සේවා කොන්දේසිවලට සහ රාජ්‍ය සේවාවන් විනාශ කිරීමට එරෙහිව ප්‍රතිරෝධය සංවිධානය කිරීමේදී වැදගත් කාර්යභාරයක් ඉටු කර ඇත. ඔවුන්ගේ අරගල අන්තර් සම්බන්ධිත බවත්, ඒකාබද්ද ප්‍රතිචාරයක් අවශ්‍ය බවත් හඳුනා ගනිමින් ඔවුන් ජාත්‍යන්තර සම්බන්ධතා ඇති කර ගැනීමට ද පටන් ගෙන ඇත.

ඉදිරි කාලපරිච්ඡේදය තුල කක්‍රික-ජාස කර්තව්‍යය වන්නේ, කම්කරු පන්තිය සඳහා සංවිධානාත්මක කේන්ද්‍රයක් ලෙස සේවය කරන බලගතු ජාත්‍යන්තර ජාලයක් ගොඩනැගීම දක්වා මෙම කාර්යය පුලුල් කිරීමයි.

2025 දී සමාජවාදය සඳහා සටන භාර ගන්න! හජාජාක ගොඩ නගන්න! ලෝක සමාජවාදී වෙබ් අඩවිය ට සහාය දෙන්න!

කම්කරු පන්තිය දැවැන්ත අභියෝගවලට මුහුන දෙන නමුත් එයට අතිවිශාල බලයක් ද ඇත. ධනවාදයේ අර්බුදය ගැඹුරු කරන ක්‍රියාවලීන්ම—ගෝලීයකරනය, කෘත්‍රිම බුද්ධිය සහ නිෂ්පාදනයේ සංකේන්ද්‍රනය වැනි තාක්ෂනික දියුනුව—කම්කරු පන්තියේ ජාත්‍යන්තර එක්සත්කම සඳහා කොන්දේසි ද නිර්මානය කරයි.

ඉදිරි මාස නිර්වචනය කිරීමට සිදුවනු ඇත්තේ, දැවැන්ත කම්පන, අර්බුද සහ මහජන අරගල පුපුරා යාම සමගිනි. විප්ලවවාදී නායකත්වයකින් තොරව, මෙම අරගල පාවා දීමේ, අපසරනය කිරීමේ හෝ තලා දැමීමේ අනතුරට මුහුන දෙනු ඇත.

ලෝක සමාජවාදී වෙබ් අඩවිය එහි සියලුම පාඨකයන්ගෙන් ඉල්ලා සිටින්නේ, අප හා සම්බන්ධ වීමට තීරනය කරන ලෙසයි. දැන් බැරෑරුම් දේශපාලනය, විප්ලවවාදී දේශපාලනය වෙනුවෙන් සටන් කිරීමට කාලයයි. ට්‍රොට්ස්කිවාදී ව්‍යාපාරයේ සමස්ත ඓතිහාසික සම්ප්‍රදායන් තුල මුල් බැසගත්, හතරවන ජාත්‍යන්තරයේ ජාත්‍යන්තර කමිටුව, විප්ලවවාදී සමාජවාදයේ වැඩපිලිවෙලක පදනම මත, සියලු ආකාරයේ ජාතිකවාදයන්ගෙන් තරයේ බිඳීම සහ ජාත්‍යන්තරව කම්කරුවන් එක්සත් කිරීම සඳහා සටන් කරයි. ඉදිරියට යාමට අන් මගක් නැත.

සමාජවාදී සමානතා පක්ෂයට සම්බන්ධ වන්න, නැතහොත්, ඔබේ රට තුල හජාජාක ශාඛාවක් දැනට නොපවතියි නම්, එය ගොඩනැගීමට උදව් කරන්න.

wsws.org/donate හි ලෝක සමාජවාදී වෙබ් අඩවියේ අලුත් අවුරුදු අරමුදලට පරිත්‍යාග කරන ලෙස ද අපි අපගේ සියලුම පාඨකයින්ගෙන් ඉල්ලා සිටිමු. ලෝක සමාජවාදී වෙබ් අඩවිය මුලුමනින්ම ක්‍රියාත්මක වන්නේ, එහි පාඨකයන්ගේ සහ ආධාරකරුවන්ගේ සහයෝගය මත වන අතර, සිය දේශපාලන ස්වාධීනත්වය පවත්වා ගැනීම සඳහා සියලුම සංගත හෝ රාජ්‍ය අරමුදල් ප්‍රතික්ෂේප කරයි. ඔබේ පරිත්‍යාගය, ලෝක සමාජවාදී වෙබ් අඩවියේ වැඩ කටයුතු තිරසාර කිරීමට හා පුලුල් කිරීමටත්, 2025 සහ ඉන් ඔබ්බට සමාජවාදය සඳහා වන සටන ශක්තිමත් කිරීමටත් තීරනාත්මක වේ.

මෙම තීරනාත්මක සන්ධිස්ථානයේ දී, යුද්ධයට, අසමානතාවයට සහ ආඥාදායකත්වයට විරුද්ධ වීමට උත්සාහ කරන සෑම කම්කරුවෙක්ම සහ තරුනයෙක්ම ක්‍රියාත්මක වීමට පියවර ගත යුතුය. සමාජවාදී සමානතා පක්ෂයට බැඳෙන්න, ලෝසවෙඅට සහයෝගය දක්වන්න, සමාජවාදී විප්ලවයේ ලෝක පක්ෂය ලෙස හතරවන ජාත්‍යන්තරයේ ජාත්‍යන්තර කමිටුව ගොඩනඟන්න!

සමාජවාදී සමානතා පක්ෂයට සම්බන්ධ වීම පිලිබඳ තොරතුරු සඳහා පහත පෝරමය පුරවන්න.